Friday 14 July 2017

發牢騷

今日容許我發一陣牢騷, 因為好火滾, 連續四件事令我陷入爆粗邊緣.

一.
噚晚哥哥發高燒, 喉嚨發炎.
但今日有校際choir比賽, 哥哥不想錯過.
於是我話如果今朝起身無燒, 我就開車送佢去學校, 咁佢可以遲些少起身.
今朝無燒, 6.30叫佢起身.
6.45 居然仍在換校服, "媽咪, 你幫我執choir套制服同鞋襪啦."
好, 見你病, 我忍, 幫你執.
跟住大少爺就好悠閒地邊食早餐邊睇手機.
幾乎七點時, "食咗藥未呀?" "噢"
食完藥, 原來仍未執好書包.
最後7.10出門, 每條路都塞車!
早會時間是7.30!!!
當然阿媽我一上車就不停地哦, 你以為我識開飛機定火箭呀!
7.26到小學部後門(中學部前面勁塞), 唔該自己行過去, 我已盡人事了.

二.
今朝八點半有個deadline, 一定要寄出份文件.
噚日叫同事跟, 做完寄俾我過目下才寄出.
成晚無聲氣, whatsapp加sms才覆話噚晚會做好.
最後係淩晨先寄俾我. 今朝我9.30要去外面開會.
唯有送完囝囝返學後開車返公司, 改完份嘢再寄出, 然後才去開會.

三.
今朝趕時間, 所以一早8.10到公司就去canteen買早餐和咖啡 (平時我自己帶早餐的).
我: "Auntie, 唔該打包炒麵和一杯咖啡"
Auntie: "我仲有好多嘢要拎出嚟先呀...我哋八點半先開始架....(下刪無數字)"
阿姐, 我真係好趕時間呀, 可唔可以求其俾包炒麵我呀, 咖啡無就算啦.
(之前個canteen operator好早就開工, 七點幾到都有早餐有咖啡賣)

四.
邊食早餐, 邊改文件.
跟住又開車去開會.
有另外三個同事, 佢哋由屋企直接去.
(我公司喺好山旮旯的地方, 無人朝早喺外面開會會先返公司再去囉)
呢三位哥哥好勁爆, 開會前連要見的那間公司資料都無揾過, 全程廢噏, 激死!
我唯有盡量幫佢哋兜, 但其實我好想揾窿捐.
開完會10.30.




8 comments:

  1. 呻完有冇舒服啲?加油啊!

    ReplyDelete
  2. 我有時都會咁架,諸事不順。好彩公司有個好partner,可以分擔下咋。

    ReplyDelete
    Replies
    1. 做嘢周不時都會有啲唔順意時, 但呢日一口氣咁多樣就攪到我好滾囉.
      我都好想有個好partner幫到手.

      Delete
  3. 呻咗出黎舒服D~我自己唔可以屈埋~乜都同人傾架~!

    ReplyDelete
  4. 我有坐定定, 聽晒你呻呀... 笑...^^
    其實聽完都覺得, 如果係我, 都會好爆...
    我生平最怕同是是但但或者永遠懶地硬的人一起工作。永遠聽一半錯一半,再是但完成一半。又或者永遠唔做好自己本份。其實唔係要求人人都好叻,要話頭醒尾。但最少做好自己本份,認真d...

    ReplyDelete
    Replies
    1. 嘩多謝你咁好耐性睇晒呀.
      係, 最少都要做好本份同認真做嘢. 最慘我係比較完美主義, 所以人哋求求其其去做我會好掹.

      Delete

Related Posts Plugin for WordPress, Blogger...