Tuesday 30 November 2010

窩心的囝囝

大仔是非常感情豐富的, 從小就會關心人, 會逗人開心.

上次到奶奶家食飯, 他叫我給他一張紙.

他拿了紙就趴在地上寫字畫畫, 說要送給"女麻""女麻".  "女麻""女麻"收到時多開心, 立刻放在玻璃柜內珍藏.

囝囝雖然大部份時間都好挑皮, 但有時都好抵鍚.


到奶奶家的特定節目 - 和猫猫玩.  但嗰日我隻肥猫好唔老黎, 唔肯同囝囝們玩.


囝囝們就轉移目標, 揾奶奶的瘦猫玩.  瘦猫好細膽的, 對住兩個熱情囝囝想逃跑又唔敢, 好可憐呀.


細佬仲拎住波波追住瘦猫要猫猫陪佢玩, 正儍豬, 隻猫又點會陪你玩波波吖.



Monday 29 November 2010

泰式風味南瓜湯 (附食譜)

呢篇係特別為Meimei寫的.

上次她問我南瓜可以點煮, 咁我就即刻第二日就煮南瓜湯諗住post, 但撞啱囝囝生日, 所以拖到依家先post. 

我呢碗係參考泰菜食譜書的, 因為要遷就Daddy和囝囝們就走辣.


我用蝦殼和江魚仔來淆湯, 跟住加入乾葱碎(shallots)和蝦膏, 攪勻, 加入南瓜(切大塊), 煮至南瓜淋後才加入蝦, 用魚露來調味.  上桌前加入basil和黑胡椒.  應該用Thai basil但我當時冇, 就用了自家種的sweet basil, 影相就靚, 但唔多對味, 下次都係要用番Thai basil先得.

Meimei, 呢個就係我既簡化煮法, 希望你鐘意啦. 

原食譜用butternut squash, 我換成南瓜. 份量我冇跟食譜, 因我嗰時未買泰國蝦膏, 用了李x記的, 所以鹹度唔同, 魚露份量就自己因.

Northern butternut squash soup

Friday 26 November 2010

朱古力慕絲榛子脆脆蛋糕 (食譜)

大仔今年的生日蛋糕, 上面裝飾是極沒創意的Elmo.

不過我覺得比上次整俾細佬既進步少少, 啲字寫得好少少, Elmo個鼻唧多一層, 望落立體少少.

蛋糕本體係朱古力慕絲榛子脆脆蛋糕, 參考幾個食譜砌出來的.  今次啲慕絲好滑, 個朱古力海綿蛋糕都好鬆軟, 脆脆就當然最好食.  唯一嫌慕絲甜咗啲, 但囝囝和Daddy又話ok喎, 佢哋兩個係嗜甜怪.  另一樣好睇唔好食既就係圍邊啲馬卡龍, 本身好好味,  外面脆入面煙韌, 但貼喺蛋糕邊一晚後就淋晒, 係咪要先搽一層嘢保護先痴上去呢?  有冇高人可以教吓我?  可能我要去外面買番個有馬卡龍圍邊既蛋糕嚟食吓先知.


Thursday 25 November 2010

泰式青咖哩雞 (附食譜)

星期六晚响Pasir Panjang Road間雜貨舖買了泰國小茄子和Thai basil, 第二晚就即刻用來煮青咖哩雞.

之前在我樓下的超市買了呢罐青咖哩醬, 上面有做法, 可惜全泰文.


Wednesday 24 November 2010

囝囝生日飯 - chicken rice buffet

星期一囝囝正日生日, 我們去了NUSS Graduate Club裏面的Cafe on the Ridge食晚飯.

上個月發現嗰度平日夜晚和公眾假期前夕都會有chicken rice buffet, 囝囝至愛雞飯, 啱晒.

一入去就見到有一個燒味station 和生滾粥station, 即時要了一碟叉燒拼燒雞加雞腎.  成碟幾乎囝囝食晒, 我只試了雞腎.


生滾粥可以自己選料跟住即時煮, 幾多選擇, 有魚片, 牛肉片, 雞絲, 豬肉, 豬腸, 豬肝, 皮蛋, 豬肚.... 我要了一碗豬肝魚片, 啲粥底好綿好正, 連平時唔食粥既Daddy都食咗一大碗.


Tuesday 23 November 2010

滿足的泰菜

囝囝生日party後, Daddy話我哋响廚房攪咗成大半日, 晚飯唔好煮出街食.

我鐘意食泰菜, 所以揀了一間泰國餐廳, 叫E-Sarn

曾經一個泰國朋友講過E-sarn係泰北一個地方, 啲嘢食出名辣的.  好多年前呢間舖仍喺Sixth Ave時我和Daddy去食過, 真係好辣, 但好好味好地道.

最近經過發現呢間已經搬咗去Pasir Panjang, 店內裝飾和舊店差不多, 坐得都好舒服.


六點出少少我哋就到, 所以仲未有人客.

叫了一碗細的海鮮冬蔭公, 夠兩個人分, 我和姐姐的, 因為都好辣吓但好味道, 成碗都係料.


Sunday 21 November 2010

哥哥六歲喇

哥哥聽日六歲生日, 提前昨日攪一個小型生日會.

可能因為已經學校假期, 家長冇check書包(我都冇再check囝囝書包), 所以只有兩個回覆, 一個嚟唔到, 一個星期五晚覆話嚟.  即係仲有四個可能臨時會出現, 咁叫我點去預備食物呢?

好彩時間訂在下晝兩點半開始, 下午茶時間可以隨便整幾樣點心.  不過都要一早七點幾就起身預備食物, 一邊整一邊好眼瞓.

先睇個蛋糕, 囝囝一早講好要同細佬一樣要Elmo cake, 不過上次細佬既係白朱古力熱情果啫哩蛋糕, 佢唔食白朱古力, 所以要黑朱古力.  個蛋糕花了兩晚時間來做, 咁啱之前幾日有蛋白剩玩macaron, 順便用埋來做圍邊.


Friday 19 November 2010

冬瓜豆卜炆火腩, 冬蔭公

聽日就係大少爺六歲生日party, 呢兩日忙着預備, 好攰呀! 

我只答應囝囝開個小party, 所以只發了八張邀請咭給他的同學仔, 仲未有家長回覆要嚟, 家陣好擔心到時冇小朋友嚟囝囝就會好失望.    早知就攪大佢, 請埋我自己朋友啲細路啦, 依家先請人已經太遲.

上次housewarming dinner 皮焗得唔夠脆的燒腩, 唔怕嘥, 存了入冰箱, 一個星期後用來炆冬瓜豆卜.

大概話俾姐姐知點整, 佢話炆咗半個鐘左右, 豆卜和冬瓜吸晒啲味, 超好味.  除咗脆卜卜的燒肉皮外, 炆到淋晒的燒肉我都一樣鐘意.  囝囝們嗰晚食飯食得好快, 大仔仲難得添飯哩. 

响呢邊好難得炆火腩架, 因為呢邊外面買燒肉又貴又唔靚, 要自己整開燒肉有食剩先會用嚟炆咋.


Thursday 18 November 2010

生日muffins

有睇開呢個blog既朋友, 記唔記得我上年參加咗一個international student host family program 呢?  個program主要目的係讓留學生有機會接觸本地家庭, 令佢哋更容易適應亦給他們在外地也有個家的感覺. 

今年負責人問我哋要唔要繼續參加, 咁有意義而我哋時間上亦許何, 當然繼續喇.

今年的學生也是女的, 從西安來, 剛開始讀大學一年級.  我上次housewarming(5/11)那天也邀請了她, 她離開後我才知道原來第二日是她的生日.  約她吃生日飯, 她說要趕project, 沒時間和我們吃飯慶祝, 於是我就烘了blueberry crumble muffins作她的生日禮物.


Wednesday 17 November 2010

南瓜吉士卷 pumpkin custard rouge

今日是馬來同胞的節日, 我們又有一天的公眾假期, 太好了.

大仔下星期一生日, 要求開生日會.  所以今日會是shopping day, 要去買食物和party用品.  現在小朋友真幸福, 我三十幾歲人都從未開過生日會, 小時候連生日蛋糕都沒有.

九月回港時特地去買了獨角仙的"豈能戒甜"一書, 書內圖片很美, 製作步驟亦解釋得非常清楚, 是很值得買的, 不會做單欣賞亦不錯.

翻來翻去, 發覺書內大部份食譜所需的某些材料在新加坡都很難買到.  就算能買齊材料, 很多食譜都並不容易, 以我未拜過師學藝的三腳猫功夫, 試整也只會浪費物資. 

但自從上次成功整了檸檬瑞士卷, 令我對卷蛋有多一點信心.  仙姐書內有這款南瓜吉士卷, 看步驟似乎還可以應付, 做起來原來還是蠻繁複的也要有一點技巧. 

南瓜要切成薄片原來非易事, 索性先去皮.  原食譜要用南瓜籽, 囝囝們都不吃的, 就省了.  蛋黃和蛋白分別打發, 才加粉, 再加南瓜蓉, 最後加牛奶和牛油, 每加一樣材料要拌勻時都一拌一驚心, 很怕麵糊攪太多會消泡.

蛋糕成功出爐, 這是朝下的一面, 可能爐火太猛, 居然焗至有虎皮效果.


卷蛋技術仍有很大進步空間, 但成品已算滿意 (不要給仙姐看到就好了 ).  蛋糕裏那一小塊的黃綠色物體並不是窿窿, 而是大粒的接近南瓜皮的南瓜塊, 我懶惰沒慢慢弄好南瓜蓉, 反正有點南瓜粒多一點點口感也ok的. 


這卷蛋很受歡迎, 連平時不吃南瓜不吃吉士醬的大仔都說very good.

我決定要去買一隻好看的長型碟來放卷蛋.

Tuesday 16 November 2010

龍王杏杏仁糊

好耐好耐以前返香港買了龍王杏, 大大粒但帶衣的. 

一大包只用過一次來煲湯, 就一直擱在雪柜一角.

見meimei整杏仁糊, 諗起被我打入冷宮多時的龍王杏.

龍王杏比普通南北杏大粒很多, 我沒攪拌機, 只有攪拌捧, 怕炒杏仁後杏仁太硬打唔碎, 所以就用水浸, 順便去衣.


加了一小掫米一起打, 但水加太多, 出來不是杏仁糊而是杏仁汁.  用杯來飲都好好味, 囝囝們飲了好幾杯.

見meimei 加蛋白, 令我想用啲杏汁來整燉蛋白, 可惜要出門, 沒時間整.  就叫姐姐加燕菜來整杏仁豆腐, 但姐姐自作聰明加入罐頭桃, 完全蓋過杏仁味, 但當啫哩食都唔錯.





Monday 15 November 2010

結婚十週年晚餐

結婚十週年紀念日, 適逢囝囝畢業concert, 只有一個小時食晚餐.

並沒特別慶祝, 只在囝囝concert地點附近的一間叫Blooie Roadhouse的酒吧吃.

到時才六點, 仍是happy hour, 趁機點酒飲.  啤酒選擇非常少, 索性叫杯紅酒.  呢杯紅酒因為係happy hour都仲算平, 但用呢個價錢在香港已經可以買到一支.




別誤會氣氛有多浪漫, 飲酒的只有我一個. 

落柯打後, Daddy就行出酒吧外打電話傾公事, 只有我一個人對住杯酒.

我叫的BBQ baby back ribs, 夠腍, 配菜份量和味道都唔錯, 但啲排骨食落好油好膩.




Daddy 的sausage platter, 係比較明智之選, 薯條好脆好味, 啲菜有少少似德國式的sauerkraut, 酸酸的而且加了辣椒, 好開胃, 三條腸仔都好正.  我自己嗰碟食到一半同Daddy 交換, 因為佢碟好食好多.




Friday 12 November 2010

醉雞 (食譜)

最近看大少奶的書和一本雜誌, 發現有樣叫糟滷的汁料, 可以用來整醉雞.

心想呢啲嘢呢邊應該冇得賣, 而且我一向整醉雞都是自己調汁料的, 於是就冇放喺心上.

前個星期六去Sheng Siong買牛腩時, 居然見到一樽樽寫住大大個"糟滷"的物體, 仲要係雜誌上介紹的上海寶鼎牌喎, 一樽只賣兩個幾, 就買樽嚟玩吓.




未用過糟滷, 唔知咩味, 招紙上面寫材料: 黃酒, 魚露, 鹽, 香料....

大少奶和雜誌上的食譜都係寫只用糟滷嚟浸就得, 唔駛加酒, 喺咪真架? 支糟滷先兩個幾, 一支花彫酒呢邊賣成十幾蚊噃, 係就可以慳番好多.

Thursday 11 November 2010

Housewarming dinner on Deepavali (5/11/2011)

上星期五除了housewarming lunch, 仲有個housewarming dinner.  一日兩輪, 攰到趴喺度.

事緣上星期一至三我公司有啲大粒佬由外國嚟開會, 攪到我成個星期都忙到氹氹轉.  其中一個大粒佬前個星期未到前突然話會留多兩日, 想同我組傾多啲喎.  我老闆响星期二晚就飛去英國, 就一聲唔該叫我自己攪掂.  星期五公眾假期喎, 個大粒佬仲要坐晚機, 咁點算?  於是咪請佢嚟個housewarming party囉, 但佢話因為坐晚機, 所以希望食晚飯, 但教會小組係lunch, 咁就焗住我要整多個dinner, 跟住臨時揾幾個同事嚟湊人數.

個lunch兩點度散band, 休息一陣, 就開始整蛋糕做甜品.  請鬼佬食飯, 點都要有個飯後甜品既.

五點左右開始焗叉燒同燒肉, 五點五十五分用最快速度沖個涼, 換番條見得人既裙, 啱啱由沖涼房出嚟人客就到.

先來mango salsa and tortilla chips 做appetizer.


Wednesday 10 November 2010

Housewarming lunch on Deepavali (5/11/2011)

上星期五係新加坡公眾假期, 叫Deepavali, 係印度同胞的屠妖節.

請了教會小組來我家housewarming.

本來組長問我幾時得閒時, 我以為是平時的家庭小組聚會, 通常只有三至四個家庭, 隨便預備少少食物就搞掂.  點知組長email出嚟居然係邀請成個小組, 仲變咗我新居的housewarming, 最後總共有33人.

因為要遷就小朋友, 聚會在朝早11點半開始.  只有我和姐姐兩對手, 晨早流流又邊煮到咁多人既嘢食, 所以星期日就開始準備, 整了上一篇寫的三十六個菠蘿包.  星期二晚整燻蹄, 星期三晚整醉雞, 星期四晚炆牛腩牛肚, 切青瓜和預備雞絲.  上個星期日間响公司忙到屎, 返到屋企又不停咁煮.

醉雞


柱候蘿蔔牛腩牛肚


Tuesday 9 November 2010

好多菠蘿包

上星期日(31/10)焗了兩爐菠蘿包, 共三十六個.


焗第一爐時分咗心, 唔記得睇住, 焗過火咗少少. 

我又懶冇將做菠蘿皮的粉類 (低粉, 吉士粉, 梳打粉和臭粉)過篩, 第一輪的包個皮冇咁靚, 可能臭粉冇平均分配喺每個包上面.  焗第二輪之前再加些少臭粉落個皮料(之前已混合)再盡量搓勻, 所以第二輪既個皮靚啲.

囝囝好無聊咁一路話佢好悶, 唔知做乜好, 於是我就叫佢帮我手滾圓啲麵糰.  佢好小心咁摺疊緊舊麵糰.


Sunday 7 November 2010

再試outback麵包

上次整Outback dark rye bread唔多似樣, 以我唔輕易放棄的性格, 一定要整到似為止.

上次顏色太淺, 明明照足食譜架, 後來在Phoon Huat見到一樽樽的molasses, 晃然大悟, 原來我上次用錯糖.  上次我買了dark molasses sugar, 係好深色的砂糖而已, 食譜上其實寫dark molasses 而唔係dark molasses sugar. 

今次顏色深好多, 味道會濃啲, 有啲焦糖味, 不過少啲彈性, 或者我搓得唔多, 但落咗dark molasses個麵糰係勁痴手的.


入爐前係咁樣, 姐姐猛笑話似某樣物體.


顏色都仲係比Outback的淺, 再試多一次, 今次加了少少可可粉, 加埋提子, 食落有啲似麥包. 囝囝問我係咩包, 我話係朱古力提子包, 佢好開心咁帶返學校食.  夜晚同我講: "邊係朱古力包呀, 都冇朱古力味!".  咁係真係加咗可可粉噃, 冇呃佢架, 只係加好少所以食唔出味之嘛.  可可粉只係用嚟加色水, 今次出嚟個樣就有九成似嘞.


為咗試呢款包, 買咗一包dark molasses sugar和一樽molasses, 又要諗點去消化呢兩樣糖lu.





Wednesday 3 November 2010

皺皮檸檬瑞士卷 (已加食譜)

星期日晚食完晚飯, 心血來潮想挑戰瑞士卷.

挑戰瑞士卷對我嚟講好有意義的, 因為當年就係因為家政堂整瑞士卷令我覺得自己係冇整蛋糕的天份.

中學時學校只有一部電動打蛋器, 當日上堂時輪唔到我那組用, 要用手打發全蛋, 打來打去都打唔起, 但又趕落堂, 就求其撈埋粉入爐焗, 出嚟蛋糕薄薄一片, 痴到張紙實一實, 根本就撕唔出, 咁條瑞士卷就衰咗嘞.  嗰次係我第一次家政堂整唔出嘢, 好大打擊架, 之後十幾年都唔敢焗蛋糕

之前整親都會甩皮, 睇書又冇講點先唔痴, 但我諗吓平時整戚風個面都好乾爽唔痴手, 所以今次就用戚風配方.  不過好難刮得平, 亦都冇心機慢慢去整平就入爐.  出爐倒扣在焗盤布上, 放涼後真係冇痴, 開心屎我.

完成品就係咁嘞, 個皮皺咗啲, 但層皮完整無缺我己經好滿足.


中間只搽上一層薄薄的Lemon curd, 蛋糕好鬆軟, 好好味, 第二朝做早餐一下子成條食晒.

其實如果將lemon curd混入打起忌廉做餡會更好味, 但呢次只係試做, 而且嗰日姐姐放假, 我做咗成日嘢已經懶得去攪咁多嘢嘞.

個lemon curd 係我自己整的, 只用檸檬, 雞蛋, 糖和牛油, 全部撈埋放入微波爐叮, 成個過程幾分鐘攪掂, 可以用來做蛋糕夾心或搽面包, 好正架.


Tuesday 2 November 2010

奇異果酵素

兩個星期前在超市見到有便宜的奇異果, 摸落仍硬, 肯定是酸的. 

但平嘢唔好嘥, 買來整酵素, 反正要加糖.

入樽後幾個鐘已經出好多水, 糖亦溶得七七八八.


第四日出好多泡, 見到咁多泡真開心.  跟住我每日都去探吓佢, 每次睇到啲泡泡就好興奮好期待收成.



以前整酵素, 我都係交俾姐姐去睇, 每日開蓋透氣既任務都係姐姐做的.  但自從見到呢樽咁多泡之後, 我對酵素既興趣大大增加, 因為見到啲泡泡真係好開心架.

星期日收成, 失望, 唔夠甜唔好味.  可能啲奇異果酸啦, 要比平時放多啲啲糖, 或者下次我加啲其他生果落去.  唔好味既我留自己飲啦, 仲有一樽梨今日收成, 希望會ok啦, ok就拎去俾奶奶, 因為佢啲便便唔多暢通.

Related Posts Plugin for WordPress, Blogger...