Friday 30 April 2010

氹細路

我成日都整嘢食, 但其實我香港啲家人都冇乜食過我煮啲嘢架, 因為我十幾歲就嚟咗呢度.

前個星期返香港時, 就決定整啲嘢嚟氹吓我姨甥和姨甥女.

佢哋睇我blog睇中strawberry panna cotta, 咁易既當然冇問題啦.  即刻去sweetie 同二記入貨. 

姨甥不知幾興奮, 一早打電話問我幾時去佢屋企整, 放學又再打, 我媽咪話如果我嗰日唔整, 佢成晚都唔駛瞓呀. 

一次過整夠十二杯, 大人細路都有得食.  成家都食得津津有味哩. 


Tuesday 27 April 2010

Gathering @ 何老太 Apr 2010

多謝各blog友的關心慰問, 我已經好少少. 

呢幾日都瞓唔好, 變咗隻熊貓. 

星期六去了何老太家gathering, 多得早安夫人和Hanrik做攪手, 廿幾個人出席, 非常熱鬧.


Sunday 25 April 2010

軟弱

最近心情很差.

傷心傍惶時, 會想到這首歌, 眼淚就流下來.

"痛苦從眼中流下, 我知道祢為我擦...

...

所需要的力量祢天天賜給我, 祢恩典夠我用"


Monday 19 April 2010

星航SQ870

我依家身在香港, 今次有些事要處理, 所以自己一個人返, 比較多自由時間.

星期六坐星航返, 特價飛, 比原價平成200蚊坡紙, 但只限坐舊啲既機, B777-200.

我坐的班機真係好舊吓, entertainment system 都係舊既, 啲電影仲同節目表登的唔一樣添. 


你哋有冇遇過氧氣罩跌落嚟呢? 搭咗咁多次飛機都只係喺起飛前啲safety video見過, 但今次居然俾我遇上.

哈哈, 唔駛擔心, 成程機都好安全. 只係架機起飛時, 啲氧氣罩突然跌落嚟啫, 之後我想睇書都唔得, 因為啲罩擋住啲燈火.  為著安全起見, 啲空服又唔敢塞番入去, 全程機啲氧氣罩都响我頭頂fing 來 fing 去.  證明呢架機係幾需要upgrade.





Friday 16 April 2010

生煎包

第一次整生煎包, 跟獨角仙食譜. 

農曆新年前煮的, 一直未有機會post.

用了白菜豬肉餡, 唔係好識包. 


喜歡吃生煎包, 因為可以同時吃到兩種口感, 上面軟熟, 下面香脆.


一手挾包, 一手影相, 所以矇矇哋.

呢種香口又可以點醋食既嘢, 囝囝最鐘意, 一個人食咗幾個, 仲留咗兩個第二日做早餐.

第一次整沒經驗, 有部份包包頂部麵糰未熟得晒, 但整得好嗰啲真係好好食, 仙姐食譜好得呀.

Thursday 15 April 2010

日本行(6) - 完結篇

想介紹吓東京住的酒店 - Best Western Shinjuku Astina Hotel.

酒店非常新, 應該開咗冇耐.  房間意外地寬敞, 東京標準算幾大.  床褥用上Simmons, 羽絨被又軟又輕, 瞓低都唔想起身.


酒店有一間餐廳, 供應早午餐buffet, 只收1000和 1200 yen.  如果房租包早餐的話, 早餐餐卷仲可以用來食午餐, 唔駛加錢.  1200yen外面都係買到bento咋, 居然食到酒店buffet, 仲係幾好食.

lunch buffet, 都幾多選擇架.


Wednesday 14 April 2010

日本行(5) - 東京

第三日, 即星期日朝早就坐新幹線 (shinkansen) 由大阪去東京.

Nozumi 14 號車, 個車頭成隻扁嘴鴨咁.


在入閘前買了便當在火車上食, 呢份係波士既 - 牛肉飯.

初時我哋以為要快啲食, 怕凍咗唔好食.  佢打開個盒, 筷子都叉咗落去先發覺原來盒內另有乾坤. 白色兜下面有包好似暖包既物體. 撕開暖包上面密封膠紙後將兜飯放番上面, 岔蓋等五分鐘, 兜飯就熱到冒蒸氣添, 啲日本人諗得真週到.  當然俾價錢就貴啲啲啦, 盛惠1200 yen, 不過波士話唔錯.


Tuesday 13 April 2010

清淡海鮮餐

我一家都很愛吃貝殼類海鮮, 所以每星期六去街市都會揾吓有冇蜆, 螺之類.

上星期六見到有新鮮青口賣, 即買一公斤.  為了青口, 又去買包咖哩葉.  用蒜蓉, 豆豉, 咖哩葉和花雕酒同炒, 青口好鮮甜, 兩個囝囝都食到舔舔脷.


木瓜煲石斑魚骨, yummy!  有魚湯飲好開心. 


再加條蒸魚和油菜就成了清淡的一餐.  姐姐唔知我要影相, 已經揀咗啲魚肉來俾細佬.  呢條魚唔知叫咩名, 呢兩個星期街市都有, 仲要好平吓, 肉好滑, 用來蒸最正.





Monday 12 April 2010

瘋狂包包日

昨日心血來潮想整包包, 有幾款都想整, 於是一次過整三款.

我啲愛心麵包似孚愈來愈被接受, Daddy只係行入廚房問吓我整乜, 我話麵包, 佢就"哦"完一聲行番出去, 以前實嘈我哦我架嘛.  今朝上機前(今個星期去香港公幹)居然問我攞麵包食喎, 真神奇. 

連姐姐都話要學整, 雖然我都係半桶水, 但都係義不容辭, 佢識整我又可以做少啲. 

全部用直接法, 貪快.

1.  菠蘿包.


Friday 9 April 2010

舊作 - 毛毛蟲樣的腸仔包

呢兩日好忙, 唔得閒寫, post住舊作先.

三年前整既腸仔包, 係full size俾大人食既.

唔記得响邊個blog學呢個造型, 包得麻麻, 好似四條毛蟲咁.

但最近試過兩次都整唔返, 要繼續努力嘞.




Thursday 8 April 2010

日本行(4) - 京都

終於行到清水寺嘞, 有個女僧人化緣喎, 好似細個時睇啲日本卡通片咁.


入面其中一條走廊.


呢樣我覺得好有趣呀, 個柜枱專賣"守", 我諗係平安符之類啩.  有頭痛, 買頭痛, 腳痛買腳痛, 長壽, 學業, 總之要乜有乜, 500 yen 起.

Wednesday 7 April 2010

日本行(3) - 京都

第二日係星期六, 唔駛開工, 係唯一去觀光的一天.

酒店唔包早餐, 所以朝早到梅田站的麵包舖買包包做早餐. 

櫻花季節當然要揀個櫻花包.



外觀好吸引, 最主要係啲cream上面朵櫻花吸引我買.  裏面好有層次, 有櫻花餡, 好似蓮蓉咁, 中間有粒mochi, 煙煙韌韌, 呢個combination好得意.  個包都好好食, 唯一唔鐘意既係上面吸引我嗰朵櫻花, 醃得好咸呀!

Tuesday 6 April 2010

日本行(2)

今次去日本只是公幹, 除了最後兩日有多一個同事加入外, 其餘時間都只有我和波士, 所以沒什麼機會去玩.

行程如下:

第一, 二日  大阪

第三, 四日  東京

第五, 六日 大阪

第一, 二日在大阪住的酒店叫Hotel New Hankyu Osaka, 在梅田站上面, 非常方便.  酒店很舊, 房裏面的墙紙都有少少剝落.

最有趣的是酒店居然沒有 business centre.  Check-in 時有個香港女士問柜枱可唔可以帮佢由thumb drive 印四頁文件, reception 話佢哋可以租架printer俾佢自己印, 1000yen 一日.  那女士當時已經唔多高興, 印四頁紙要租部機! 再問落去個reception話唔包紙, 跟住拎個地圖出來教該女士點去買紙.  佢即時火起, 話以後唔住呢間酒店......, reception 於是去問經埋, 返來話可以送五張紙俾佢.  我聽到真係覺得好搞笑, 不過我都好明白嗰位女士既感受.

第一日下晝開完會已經好攰, 晚餐在附近的Yodobashi Umeda 樓上餐飲區吃.  選了這間叫四季の味的餐廳, 專賣釜飯.

天氣比較凍, 見到窗櫥啲釜飯好吸引, 感覺食咗會暖笠笠, 所以即刻入去.


Monday 5 April 2010

迷你腸仔包, 腿蛋包

噚日講過我整咗腸仔包和腿蛋包, 焗好就係咁樣嘞.




嘻嘻, 太耐冇整包, 唔多記得點造形了, 整得醜醜的, 係時候惡補吓.  Mommy Dearest, 你幾時再開班呀?

又係用中種法, 大清早出門前預備中種麵團, 放雪柜由佢發酵, 等中午返屋企再放室温發酵多一陣就可以開始整. 

特別整迷你型, 方便囝囝帶返學校做下午茶.  每個包包用30g麵團, 細細個容易食.  雞蛋用買咗好耐都未開張的迷你長方形煎pan, 煎成厚厚一片再切成粗條.

Sunday 4 April 2010

鮮奶球

今日是復活節, 祝大家復活節快樂.

大清早六點半就起身準備去祟拜, Daddy 因為要事奉, 所以一早就己兩手fing fing咁出門.  而我呢就趁有時間預備定中種麵團, 等祟拜回來就整包包俾囝囝返學做茶點.

幾經辛苦先叫得醒兩位少爺,  結果晨早起身最尾都係遲到.  今朝又落大雨, 手抱一個再拖一個仲要擔摭, 攪到依家成身骨痛. 

大仔起身見唔到Daddy就問Daddy去咗邊, 我話Daddy要早啲到教會, 已出門了.  跟住佢好緊張咁問: "咁我哋有冇車呀?", 我話有, 佢就即刻鬆一口氣.  家陣啲細路真係太驕生慣養, 等佢大啲要佢自己搭巴士.

啱啱搓好腸仔包同火腿蛋包, 未入得爐住, 聽日先俾你哋睇.

星期五整鮮奶球, 成三年冇整過嘞, 個面都唧得樣衰衰咁.



Friday 2 April 2010

受難節

我回來了, 你哋有冇掛住我呢?

今天是受難節, 是要紀念主耶穌為我們受苦被釘的日子. 感謝主, 感謝祢那麼愛我們.


今天早上在教會聽到的一首詩歌, 很感人.

受難節祟拜後, 去了小組的家庭聚會. 這是每兩到三個月才會有一次的, 目的是讓小朋友也可以參加. 因為只為有小孩的家庭而設, 主題都是圍繞家庭, 今天的主題是家庭祟拜.
Related Posts Plugin for WordPress, Blogger...